Hi veduu mai brillà i stell
A la nott sul firmament
Che lusissen 'me gioiell
Scintillant e bei lusent?

Ona stella de qui là
Su la tera l'è borlada
Come incoeu desnoeuv ann fa,
E l'han Carla batezada.

Guardegh ben con atenzion
Che bellezza d'ona tosa
Che finezza de campion
Ben formada e armoniosa.

Scur e riss i so cavei
Ghe incornissen on faccin
Che l'incanta fina i prei,
Che el someia a on cherubin.

I so oeucc color del ciel
Hinn de sora al so nasin,
Come on fior poggiaa sul stel
El me par el so bocchin.

La testina la se uniss
Ai so spall meraviglios
Per on coll flessuous e driss
On insemma delizios.

E se l'oeucc anmò l'se sbassa
Ghe la vesta che scond via
Ma però in del coeur el lassa
Come on sens de nostalgia.

Quanti robb voressi dì
Per cantà i so virtù,
Ma ch'inscì l'è mei finì
Se de no vemm a cà pùu.

Su i bicer e tutti alegher
Giovinott e bei tosann
Col vin bianc e col vin negher
Festeggiand sto compleann.

Anmò cent de chi dì chi
Numm voressom festeggià
Tutti quanti riunii chi
Per la soa felicità.